近年加入無綫拍劇即做男一,一口氣連拍五部劇,人氣急升,成功入屋!

結婚三年,三年抱兩,老婆任祉妍先後為佢生咗3歲大女譚晴(Renee),同埋1歲細仔譚杺(Rex),爺爺狄龍錫到兩個孫仔燶,經常幫手湊孫。

之前佢喺外地拍劇多,目前佢想多啲時間照顧父母狄龍及陶敏明,以及一對年幼仔女,專心留喺香港發展。
話咁快3歲嘅Renee已經返學,今日爹哋譚俊彥喺ig貼咗Renee參加朗誦比賽嘅相,3歲嘅Renee人仔細細就參加第十屆《中華挑戰盃》全港人才藝術朗誦大賽中嘅幼稚園組別,以普通話古詩參賽攞冠軍,認真叻女呀!

爸爸譚俊彥急不及待喺ig貼咗囡囡攞獎盃嘅威水相,仲留言︰「So proud of you my Renee」。

相中見到Renee一手拎住張榮譽證書,另外隻手就拎住獎盃,個樣仲勁得戚添!Shaun亦留言表示以囡囡為榮,一眾網民都留言恭喜佢有個咁叻嘅女呀!

(綜合報道/IG)