無綫藝人張嘉兒於2015年與金融才俊Nathan結婚,之後就誕下囡囡Leora。

佢一直都希望35歲前可以再做媽媽。

依家終於願望成真!佢孖住囡囡一齊宣佈再度懷孕,恭喜哂!(相關新聞: https://goo.gl/QV25ER)

張嘉兒到將軍澳電視城出席「十一月星辰」活動,佢依家佗B三個幾月,佢話呢個BB係佢最好嘅生日禮物。

不過今胎比上一次佗Leora嘅時候辛苦好多,成日好易攰、作嘔作悶嘅次數亦都多咗,好似長時間都處於時差狀態咁。

佢就話:「同老公一直有計劃再生,暫時未知BB係男仔定女仔,下次做產檢應該就會知道,我同老公都冇所謂,因為我係四姊妹,反而我爸爸想我生仔。」

問到將來有兩個小朋友會唔會考慮做少奶奶?嘉兒就笑笑口咁話:「唔知,依家湊一個已經冇乜時間,有第二個都唔知會點。自己都享受做媽媽,但亦希望做嘢,希望兩方面取得平衡。」
(綜合報道/on.cc)